Accumpagnaders dal project da dissertaziun: prof. dr. Alexandre Duchêne, prof. dr. em. Georges Darms, Universitad da Friburg
Quest project da dissertaziun intercurescha discurs davart lingua e cultura, che sa manifesteschan durant la realisaziun da fusiuns communalas en il Grischun. Las refurmas dad instituziuns politicas èn actualmain in tema impurtant sin l’agenda politica e surtut al cunfin linguistic dal Grischun giogan ils temas lingua e cultura ina rolla impurtanta en discussiuns da restructuraziuns. Ina fusiun communala po manar a novas constellaziuns da linguas en ina vischnanca che han influenzas sin las linguas uffizialas e las linguas da scola. Tar minoritads linguisticas evocheschan questas restructuraziuns temas, che lur lingua vegnia marginalisada u substituida. Questa lavur analisescha sut tge cundiziuns che la(s) lingua(s) giogan ina rolla en process da fusiuns e co che quai sa manifestescha. La lavur mussa era tge auters facturs che decidan davart l’acceptanza d’ina fusiun e tge consequenzas che fusiuns pon avair per linguas e pledaders.
Cun agid da l’istoriografia e l’etnografia dat quest project ina vista globala da las debattas davart las linguas, la pratica linguistica e las tensiuns tranter las gruppas linguisticas che sa manifesteschan durant in process da fusiun communala.