Il project da perscrutaziun interdisciplinar s'occupa dal connex tranter poliglotissem e plurilinguitad, instituziuns politicas e circumstanzas giuridicas en Svizra.
La Confederaziun svizra è in stadi federal cun quatter linguas naziunalas. La cultura politica da la Svizra sa basa sin l'orientaziun al consens e sin contractivas per chattar cumpromiss che duran savens lung. L'ultim temp pon ins dentant er observar ina polarisaziun adina pli gronda da las posiziuns politicas e da las discussiuns publicas.
Tge consequenzas han las praticas, las normas e las valurs politic-instituziunalas e las circumstanzas legalas per products linguistics sco pleds, debattas e moziuns parlamentaras? E viceversa: Co sa manifesteschan repertoris linguistics monolings e plurilings en il discurs politic-instituziunal?
Tge rolla giogan las differentas emprimas linguas da las acturas e dals acturs? Da tgi vegnan spetgadas cumpetenzas activas u passivas en tgeninas autras linguas u varietads – e co èn vegnidas/vegnan fatgas questas enconuschientschas linguisticas? Co acquistan p.ex. persunas novelegidas, natiralisadas u dad autras linguas in'abilitad da discurs politic-instituziunala?
A maun d'ina analisa litterara e da differents cas concrets sa fatschenta il project cun l'interacziun tranter la(s) lingua(s) e cundiziuns instituziunalas en contexts da la democrazia svizra da plirs stgalims. Cun l'egliada sin l'interacziun da federalissem e plurilinguitad, consens e polarisaziun sco era la coesiun sociala e la transfurmaziun da la societad emprov'ins da chapir co ch'ins discurra (politicamain) in cun l'auter en Svizra (plurilingua).